Departamenti i Kontabilitetit, Fakulteti I Ekonomisë, Universiteti i Tiranës, është pjesë e një konsorciumi bashkëpunimi në kuadrin e projekteve Horizon 2020, konkretisht i projektit “Leading Towards Sustainable Gender Equality Plans in research institutions – LeTSGEPs” me synimin të hartojë dhe zbatojë Plane të Barazisë Gjinore në institucionet akademike dhe kërkimore.
Projekti e zhvilloi aktivitetin e tij gjatë një periudhë katërvjeçare duke filluar nga 1 Janari 2020 deri në 31 Dhjetor 2023. Fakulteti i Ekonomisë, Universiteti i Tiranës, është i vetmi institucion kërkimor në Shqipëri i përfshirë si partner në këtë projekt. Anëtarët e tjerë të konsorciumit janë Institucione prestigjioze nga vende të ndryshme Europiane si: Universiteti i Tiranës, Fakulteti i Ekonomisë, Università di Modena e Reggio Emilia, RWTH Aachen University, Cergy, University, Paris, Mathematical Institute of the Serbian Academy of Sciences and Arts, Università di Messina, Institut de Ciencies del Mar, CSIC, Barcelona, Max PlanckGesellschaft.
Në muajin Mars 2024 u zhvillua takimi me përfaqësues të Komisionit Evropian, të cilët rishikojnë e vlerësojnë rezultatet e projektit në përfundim të tij. Në tërësinë e vet rezultatet e këtij rishikimi për projektin LeTSGEPs ishin mjaft pozitive, si më poshtë: Projekti LeTSGEPs ka dhënë rezultate të jashtëzakonshme me ndikim të rëndësishëm e të menjëhershëm. Projekti ka patur performancë shumë të mirë duke shfaqur një qasje gjithëpërfshirëse dhe strategjike të Planeve të Barazisë Gjinore dhe duke ofruar një mori materialesh mbështetëse, me të cilat janë zhvilluar trajnime për anëtarët e projektit, por përmes tyre u zhvilluan trajnime edhe brenda institucioneve kërkimore me pjesëmarrje të konsiderueshme si nga personeli akademik, ndihmës akademik, administrativ dhe të studentëve.
Fokusi i këtij projekti ka qenë në integrimin e Planeve të Barazisë Gjinore me Buxhetimin Gjinor. Ky ka qenë një aspekt kyç inovativ që i ka dhënë projektit vlerën e tij të shtuar dhe pozicionin unik midis palëve të interesuara dhe projekteve të tjera simotra.
Projekti i ka arritur plotësisht objektivat dhe synimet e tij për periudhën dhe të gjitha përfundimet e publikuara në kohë janë të një cilësie shumë të mirë. Planet e Barazise Gjinore dhe paketat e punës mbështetëse dhe përfundimet e publikuara kanë kontribuar ndjeshëm në arritjen e objektivave të LeTSGEPs dhe kanë nxitur ndryshime të qëndrueshme institucionaleKuadri i monitorimit dhe vlerësimit të projektit ka luajtur një rol kyç në vlerësimin e efektivitetit dhe përshtatshmërisë së Planeve te Barazise Gjinore.
Projekti është monitoruar nga RWTH, AACHEN University hap pas hapi dhe ka qenë një qasje praktike, gjithëpërfshirëse, duke paraqitur edhe ndryshimet e çdo institucioni kërkimor pjesë e konsorciumit. Metodologjia e monitorimit është bazuar në një qasje me metoda të përziera që synonte të vlerësonte ndikimin e zbatimit të Planeve të Barazisë Gjinore në nivel institucional dhe individual.